tolvari.net » Verkmappa

Kennslutilraun: Ljóð og stafsetning

Carlos — Mon, 01 Feb 2010 13:00:20 +0000

Vandinn við að kenna stafsetningu er að hún byggir á þekkingu orða. Ef nemandinn þekkir orðið, hvernig það lítur út, þá mun hann skrifa það rétt. Þetta á reyndar líka við um lestur, þekking orða er grunnur þess að lesturinn verði góður, nemandinn læs.

Ég ákvað að gera tilraun, nú þegar handboltinn gaf færi á. Ég notaði þjóðsönginn sem upplestraræfingu. Lagði áherslu á ljóðlínuna, greinaskilin, punkta og kommur. Lagði áherslur á tvær stafsetningareglur og gaf nemendum færi á að rifja upp reglurnar eftir upplesturinn og leiðrétta hjá sér textann, ef þeir þurftu. Síðan skrifaði ég textann rétt upp á töflu og þá fóru nemendur aftur yfir hjá sér og töldu villur sínar.

Árangurinn lét ekki á sér standa. Meira að segja þeir nemendur sem stafsetja verst höfðu fáar villur. Nemendurnir sýndu textanum tilhlýðilega virðingu og einhverjir sungu hann meira að segja. Einn eða tveir ákváðu að hreinrita hann, vildu eiga hann fallegan.

Ég ætla að fylgja þessu eftir með því að lesa fleiri ljóð sem stafsetningaræfingu. Bjóða nemendum að koma með uppáhaldstexta og nota þá líka. Smám saman verður til ljóðabók krakkanna sem þeir binda síðan inn og skreyta, t.d. með ljósmyndum og teikningum sínum.

Þessi hugmynd leyfir kennara að samþætta bókmenntir, lesskilning, skrift, stafsetningu og málfræði, svo eitthvað sé nefnt. Aðferðin býður upp á spretti í túlkun og samtali um merkingu.

Myndin er fengin með hjálp Wordle.

Saga, mynd og kennsla

Carlos — Wed, 28 Oct 2009 17:37:05 +0000

Listin að segja sögu tekur á sig ýmsar myndir, sérstaklega þegar nemendum er gefinn laus taumur. Hér vil ég segja frá dálitlu verkefni sem 5. bekkingar unnu hjá mér í fyrra. Verkefnið tók 10 – 20 kennslustundir, þá með því að nokkrir nemendur kusu að myndgera fleiri en eina sögu.

engill á teiknuðum bakgrunni (CF setti saman)

Að undangenginni innlögn um handritagerð og söguspjöld (ágætt tól til að hjálpa sér við þetta er Celtx, http://www.celtx.com). Ungir nemendur vinna best á útprentuð söguspjöld, sem þeir nota til að auðvelda sér myndatökur.

Nemendur sóttu sér nokkrar sögur á Netútgáfunni (http://www.snerpa.is/net) og fluttu í ritvinnsluforrit. Hér er um að ræða texta á opnu og aðgengilegu rými, textar sem ekki eru lengur höfundaréttarvarðir. Nemendur lærðu að búa til fyrirsagnir, efnisyfirlit og blaðsíðutal. Lásu síðan sögur sínar af skjá. Við lestur komust sumir að því að þeir skildu ekki öll orðin. Þá var gripið til netorðabókar (http://www.snara.is), orðunum flett upp og orðin ásamt útskýringum komið fyrir í neðanmálsgrein. Á þessum stað var verkefnið vistað og gætt að því að útlitshönnun for eingöngu fram með því að notaðir voru stílar (styles and formating).

teiknað og ljósmyndað í bland (nemandaverk)

Næsta skref var að nemendur teiknuðu myndir við sögur sínar í glærugerðarforriti (PowerPoint, OpenOffice Impress, Keynote). Síðan byrjaði fjörið. Nemendur komu með búninga í skólann og skipuðu félögum sínum í hlutverk. Ljósmynduðu síðan hvert annað í hópatriðum og einstaklingsatriðum með stafrænum myndavélum. Þessi þáttur gat tekið langan tíma. Nemendur skildu stundum ekki að þeir höfðu ekki ótakmarkaðan aðgang að hver öðrum, að þeir þurftu að taka stærstu hópatriðin þannig að allir voru til í réttum búningum á réttum tímum…

Þegar myndir voru komnar í vél, voru þær fluttar á sameiginleg svæði á innra neti og síðan í glærugerðarforrit. Þá tók við einstaklingsvinna, þar sem nemendur settu sögu, samtöl, hugsanir inn á einstakar glærur. Sumir nemendur fundu það út að þá vantaði myndir þegar hér var komið sögu og fóru aftur og tóku myndir.

Nokkrir voru svo hrifnir að þeir ákváðu að gera annað svona verkefni. Þá nemendur sá ég ekki í þrjá eða fjóra tíma samfleytt, en þegar þeir komu aftur, höfðu þeir á bilinu 50 – 80 myndir til að moða úr! Vitaskuld úr nýrri sögu.

Teiknað og ljósmyndað í bland (nemendaverk)

Þegar myndatökunni er lokið, er eftirleikurinn auðveldur. Nota má bestu myndir nemenda til að búa til teiknimyndir í myndvinnsluforritum eins og GIMP (http://gimp.org) sem er ókeypis og frjálst forrit. Þeir nemendur sem vilja, geta haldið áfram vinnu sinni heima, þar sem hver sem er getur hlaðið forritinu á hvaða tölvu sem er sér að kosnaðarlausu, löglega. Forritið styður við marglaga myndir og leyfir nákvæman útskurð einstakra hluta og skeytingu þeirra á annan bakgrunn.

Nokkrar góðar hugmyndir um hvernig breyta má ljósmyndum í teiknimyndir má finna hjá Melissu Clifton (http://www.melissaclifton.com). Dæmi um notkun þessarar tækni er pólítísk ádeila og spéspegill Henrý Þórs á http://pressan.is/Gulapressan og http://henrythor.blogspot.com.

No related posts.

Örugg gagnageymsla

Carlos — Tue, 23 Jun 2009 20:56:38 +0000

Ódýr hýsing gagna á netinu hlýtur að verða tilefni til þess að fólk endurskoði geymslu miklilvægra gagna. Eitt innbrot, þar sem tölva, flakkari og fleira er tekið á ekki að verða til þess að ævistarfið hverfi líka! Skoðum dæmið aðeins. Skjöl eru yfirleitt ekki stórar skrár og hægt er að velja um nokkrar geymsluleiðir:

Google Docs – Officepakki á netinu sem geymir líka skjöl (ókeypis)
Dropbox – 2 gb gagnageymsla á netinu (ókeypis)
Nethýsing (líka ftp svæði), t.d. hjá Bluehost auglýsir ótakmarkað geymslupláss fyrir $7 á mánuði ef keypt eru tvö ár fram í tímann.

Þessar þrjár leiðir eru jafn innbrotsheldar og lykilorðið sem maður velur sér. Ef maður er nemandi í HÍ getur maður geymt gögn sín á netsvæði (svokallað F: drif), sem er heimasvæðið. Hægt er að stilla það svo, að maður tengist því hvaðan sem er (VPN), þannig að það birtist sem drif í hvaða tölvu sem er.

Óþarfi að týna skjölum sínum á 21. öldinni.

No related posts.

WordPress blogg sem ePortfolio

Carlos — Tue, 27 Jan 2009 17:27:49 +0000

… margir hafa búið til sérstaka síðu um verkefnskil. Er það eitthvað sem fólk ætlar almennt að gera? – Harpa Guðfinnsdóttir 27. janúar.

Þegar rafræn verkefnamappa er hönnuð borgar sig að horfa á miðilinn annarsvegar og útlit hans hinsvegar. Eðli bloggsins er að eftir því sem dagbókarfærslum fjölgar, ýtist eldra efnið niður eftir listanum. Til að finna það aftur þarf að nota efnisorð og flokka, ef langt er liðið frá því að það var skrifað. Heimasíðan gamla eða nútíma CMS (t.d. Joomla!) er ekki svoleiðis. Þar er það efnisyfirlit sem flokkar efnið og auðveldar alla leit.

Pages í WordPress er einmitt þannig. Hægt er að kanna síðu eftir námskeiði (t.d. NKN09v) og síðan undirsíður undir henni, sem hétu skil 1, skil 2 … lokaskil. Þannig væri hægt að móta bloggsíðu að námi. Bloggið væri hægt að helga hugsunum sem vakna í námi eftir því sem við á. Það þarf hinsvegar að flokka eftir námskeiðum og tengja við efnisorð eftir því sem við á.

Ekki er úr vegi að nýta sér þá möguleika sem gefast af því að hafa sumar færslur “prívat”, “draft” o.s.frv., þannig að munur verði á vinnu- og skilamöppu.

Viðbúið er að þegar námi lýkur verði bloggið lagt niður. Þá þarf að huga að því að hægt sé að flytja færslur úr skólablogginu á nýtt bloggheimili, því að allt sem unnið er í skóla er til vitnis um getu manns. Vinnuveitendur framtíðar munu vilja geta séð hvað í manni býr. Þá er heldur ekki úr vegi að huga að því að sumt hæfir ferli manns, annað ekki. Vilji menn ekki henda sumum færslum, má alltaf gera þær almenningi ósýnilegar með því að merkja þær “private”.

Mynd fengin af Flickr.

No related posts.

Að færa námsumhverfið til nemandans

Carlos — Thu, 15 Jan 2009 23:35:17 +0000

… við erum að færa námsumhverfið til nemandans og hann tekur virkari þátt í að skipuleggja sit eigið nám … Það er líka líklegt að það verði algengara á yngri skólastigum að nemendur haldi sjálfir utan um sitt nám … námsmatið verði ekki miðað við próf heldur að milku leyti miðað við skilaverkefni nemenda og nemandi skrái námsferlið þannig að við vitum hvort og hvaða nám hafi farið fram.

sagði Salvör Gissurardóttir í námskeiðinu Kennarinn í starfi fyrir tveimur árum síðan. Með þessu finnst mér hún vísa til þess að kafla, nei, árþúsundaskil eru að verða í skólastarfi. Gamla dósentskerfið, sem byggir á fyrirlestri (og prédikunarstóllinn í kirkjunni er rótækasta myndbirting þess) er að víkja fyrir jafningja- og einstaklingsaðferðum sem eiga sér fyrirmynd í fullorðinsfræðsluaðferðunum sem þú nefndir. Hér er komið að einstaklingsmiðuðu námi í sinni tærustu mynd!

Við þurfum ný verkfæri og nýja tegund af námsumhverfi fyrir þannig nám … sem gerir það sama fyrir okkur og kaffitímarnir og pásurnar og umræðurnar í skólanum.

benti hún á. Það er ekkert nám sem fer fram með því að hlusta á fyrirlestur. Það fer fram hlustun. Námið byrjar þar sem nemandinn spyr spurninga og umræður verða til. Ég held að það sé aðalsmerki fullorðinsfræðslunnar að innleggin eru með styttra móti og samskiptin og jafningjafræðslan ríkja. Þetta er lýðræðisleg grasrótarnálgun á námi og er róttækt önnur aðkoma en dósentsmódelið. Á meðan að ræðupúltið og prédikunarstóllinn eru tákngerfingjar þess, er hringurinn og miðlunaraðferðin tákngerfingjar þess námsumhverfis sem koma skal. Bloggið með opnu umræðusvæði, umræðukerfi eins og í námsumsjónarkerfum og önnur fjöldasamskiptakerfi eru viðeigandi verkfæri þessa námsmódels.

(Áður birt á elgg.khi.is)

No related posts.